श्लोक १ ब्रजाधिराज नन्दनाम्बुदाभ गात्र चन्दनानुलेपगन्धवाहिनीम् । भवाब्धि बीजदाहिनीम् जगत्त्रये यशस्विनीम् लसत्सुधा पयस्विनीम् ॥ भजे कलिन्दनन्दिनीं दुरन्तमोहभञ्जिनीम् ॥ १॥

श्लोक २ रसैक सीम राधिका पदाब्ज भक्तिसाधिकां तदंगराग पिञ्जर प्रभाति पुञ्ज मंजुलाम् । स्वरोंचिषाति शोभितां कृताञ्जनाधि गञ्जनाम् ॥ भजे कलिन्दनन्दिनीं दुरन्तमोहभञ्जिनीम् ॥ २॥

श्लोक ३ ब्रजेन्द्रसूनु राधिका हृदि प्रपूर्यमाणयोर्महारसाब्धि पूरयोरिवाति तीव्रवेगतः । बहिः समुच्छलन्नव प्रवाह रूपिणीमहम् ॥ भजे कलिन्दनन्दिनीं दुरन्तमोहभञ्जिनीम् ॥ ३॥

श्लोक ४ विचित्ररत्न बद्ध सत्तट द्वय श्रियोज्ज्वलां विचित्रहंस सारसाद्यनन्त पक्षिसंकुलाम् । विचित्रमीन मेखलां कृताति दीन पालिताम् ॥ भजे कलिन्दनन्दिनीं दुरन्तमोहभञ्जिनीम् ॥ ४॥

श्लोक ५ वहन्तिकाम् श्रियं हरेर्मुदा कृपास रूपिणीं विशुद्धभक्तिमुज्ज्वलां परे रसात्मिकां विदुः । सुधाश्रुतिं त्वलौकिकीं परेश वर्ण रूपिणीम् ॥ भजे कलिन्दनन्दिनीं दुरन्तमोहभञ्जिनीम् ॥ ५॥

श्लोक ६ सुरेन्द्रवृन्द वन्दितां रसादधिष्ठिते वने सदोपलब्ध माधवाद्भुतैकसद् रसोन्मदाम् । अतीव विह्वलामिवोच्चलत् तरंग दोर्लताम् ॥ भजे कलिन्दनन्दिनीं दुरन्तमोहभञ्जिनीम् ॥ ६॥

श्लोक ७ प्रफुल्लपङ्कजाननां लसन्नवोत्पलेक्षणां रथाङ्गनाम युग्मकस्तनी मुदारहंसिकाम् । नितम्ब चारु रोधसां हरेः प्रियां रसोज्ज्वलाम् ॥ भजे कलिन्दनन्दिनीं दुरन्तमोहभञ्जिनीम् ॥ ७॥

श्लोक ८ समस्त वेद मस्तकैरगम्य वैभवां सदा महामुनीन्द्र नारदादिभिः सदैव भाविताम् । अतुल्यपामरैरपि श्रितां पुमर्थसारदाम् ॥ भजे कलिन्दनन्दिनीं दुरन्तमोहभञ्जिनीम् ॥ ८॥

य एतदष्टकं बुधः त्रिकालमादृतः पठेत् कलिन्दनन्दिनीं हृदा विचिन्त्य विश्ववन्दिताम् । इहैव राधिकापतेः पदाब्ज भक्तिमुत्तमां अवाप्य स ध्रुवं भवेत् परत्र तत्प्रियानुगः ॥ ९॥

।। इति श्री हित हरिवंश महाप्रभु कृत श्री यमुनाष्टकं सम्पूर्णम् ।।